Menu

១១ / គេធ្វើបទសម្ភាសន៍ជាសំឡេងបែបណា?

សំឡេងគឺជាឧបករណ៍បត់បែនយ៉ាងល្អ​ទៅនឹងបណ្តាញអ៊ិនធឺណែត។ អ៊ិនធឺណែត​គឺ​ប្រព័ន្ធផ្សព្វផ្សាយព័ត៌មានថ្មីៗដែល​ហូរមិនឈប់។ វាក៏​ជា​វេទិកានៃ​ការចែករម្លែក​បទពិសោធន៍ផងដែរ។ ដូច្នេះវាមានចំណុចជាច្រើនដែលដូចគ្នានឹងវិទ្យុ ដែលការចូលរួមរបស់​​សាធារណជន គឺ​ចំណុចខ្លាំង។

ទូរស័ព្ទ ឬឧបករណ៍ថតសំឡេង?

ជាការល្អ បទសម្ភាសន៍មួយគួរ​តែ​ត្រូវធ្វើ​ទល់​មុខ​គ្នា​។ ប៉ុន្តែពេលខ្លះ ចំពោះមុខរឿងបន្ទាន់​ឬដោយសារនៅឆ្ងាយ ​ការសម្ភាសន៍ធ្វើឡើងតាមរយៈទូរស័ព្ទ។ ក្នុងករណីនេះវាមានប្រយោជន៍ណាស់ក្នុងការប្រើ​កុំព្យូទ័រជា​ឧបករណ៍ថតសំឡេង​។ Skype គឺជាកម្មវិធីដែលល្បីល្បាញបំផុត ប៉ុន្តែទាល់​តែ​ដៃគូសន្ទនារបស់​អ្នក​មានវា​នៅ​ក្នុង​កុំព្យូទ័រគេដែរ។

អ្នកក៏អាចប្រើទូរស័ព្ទ ដោតផ្ទាល់ទៅនឹងកុំព្យូទ័រដើម្បីថតការសន្ទនា។ សូមប្រុងប្រយ័ត្ន​ ឧបករណ៍ទាំងនេះមានលក់នៅសហរដ្ឋអាមេរិកដោយសេរី ប៉ុន្តែ​វា​មិន​ស្រប​ច្បាប់​សម្រាប់​នៅ​គ្រប់ប្រទេសទេ។ កម្មវិធីឥតគិតថ្លៃដូចជា X-lite ក៏ផ្ដល់​សេវា​ដូចគ្នា​នេះដែរ។

ប្រសិនបើអ្នកមានឱកាសធ្វើសម្ភាសន៍ទល់​មុខ សូមកុំស្ទាក់ស្ទើរ។ លទ្ធផលនៃបទសម្ភាសន៍​ទល់មុខគ្នាគឺប្រសើរជាងទាំងទម្រង់ (គុណភាពសំឡេង) ក៏ដូចជាអត្ថន័យ (គុណភាពនៃសំណួរនិងចម្លើយ) ។ ត្រង់ចំណុច​នេះដែរ ឧបករណ៍ជាច្រើនអាចរកបាននៅលើទីផ្សារ តាំងពីស្មាតហ្វូនរហូតដល់​Nagra​លំដាប់​អាជីព​ដែល​មានឧបករណ៍ថតសំឡេងបែបឌីជីថល​ជាច្រើន​ប្រភេទ។ ក្នុងតម្លៃសមរម្យមួយ ឧបករណ៍ទាំងនេះគឺលើសពីគ្រប់គ្រាន់ដើម្បីដំណើរការសម្ភាសន៍សាមញ្ញមួយ។

ការកាត់​ត​បទសម្ភាសន៍ដោយប្រើកម្មវិធីឥតគិតថ្លៃ

  • នៅពេលធ្វើសម្ភាសន៍រួចហើយ អ្នក​ត្រូវកាត់តវា​៖ ជ្រើសរើស​ផ្នែកល្អជាងគេ កាត់ត​វាហើយ​ដាក់​អនឡាញតាមអ៊ិនធឺណិត។ កម្មវិធី​ Audacity គឺឥតគិតថ្លៃ និងងាយស្រួលប្រើ សម្រាប់​អ្នក​​មិនចេះសោះ​ក៏អាចប្រើបានដែរ ។ វា​ប្រើ​គោលការណ៍ដូចគ្នា​នឹង​កម្មវិធីកែអត្ថបទ​ដែរ ហើយ​មាន​ការ​បង្រៀន​ពី​របៀប​ប្រើប្រាស់​យ៉ាងល្អ។
  • នៅពេលអ្នក​ជ្រើសរើសផ្នែកត្រូវដាក់រួចហើយនោះ មានន័យថាអ្នក​បាន​ស្ដាប់​ និង​រើសនូវផ្នែកជាច្រើន បន្ទាប់មក​អ្នក​ត្រូវ​ជ្រើសរើស​ផ្នែក​ដែលមានន័យ និងខ្លីជាងគេ។ ផលិត​ផល​សម្រេច​របស់​អ្នក​គឺ​ត្រូវ​តែ​ខ្លី។ បើ​លើសពីមួយនាទី អ្នកស្តាប់នឹង​លែងចាប់​អារម្មណ៍។ លុះត្រាអ្នក​មាន​ខ្លឹមសារ​អ្វីអស្ចារ្យ​។ ដូច្នេះ​អ្នក​ត្រូវ​រក្សា​ខ្នាត​វា​ពី៣០វិនាទី​ទៅ​ មួយ​នាទី។ ប៉ុន្តែ​អ្នក​នៅ​តែ​បង្ហោះ​វគ្គ​ផ្សេងៗ​ តែ​ត្រូវ​ឲ្យ​សមល្មម​ ៖ មិន​ត្រូវ​ឲ្យ​លើស​ពី ៥វគ្គ​ទេ​សម្រាប់​អត្ថបទធម្មតា​មួយ​។

ដាក់​សំឡេងទៅក្នុងអត្ថបទ

ខុសពីបទយកការណ៍វិទ្យុ សំឡេងមិនមែនជាគ្រោងឆ្អឹងសំខាន់នៃព័ត៌មាន​លើ​វ៉ិបសាយទេ។ នៅទីនេះ សំឡេងគឺដើម្បីបង្ហាញនិងបកស្រាយន័យ។ ពេលខ្លះការឱ្យមានសំឡេងសម្រាប់​ស្តាប់​ គឺមិនមែនជាការជំនួសឱ្យព័ត៌មានសំខាន់ទេ។ ចូរចងចាំថា​ អ្នក​គួរតែ​ គោរព​គោលការណ៍​​ទម្រង់ឯកសារ​​សោតទស្សន៍​ ៖ សំឡេង​មួយស្មើនឹងគំនិតមួយ។ មិនលើសមិនខ្វះ។