Menu

៤/តើការសរសេរព័ត៌មានសម្រាប់វ៉ិបសាយ ជាអ្វី?

ការសរសេរល្អនៅលើវ៉ិបសាយមិនមែនគ្រាន់តែ​ជាការ​បញ្ចូល​បច្ចេកទេសដែល​មាន​ប្រើ​ប្រាស់​​នៅ​លើ​​បណ្ដាញ​នេះ​ទេ។ បើ​និយាយ​ម្យ៉ាងទៀត​ ការ​ប្រើ​ប្រាស់​បច្ចេកទេស​មួយ​ មិនថាជា​អ្វីទេ​ វាត្រូវ​តែ​មាន​គុណតម្លៃ​ក្នុងការផ្ដល់​ព័ត៌មាន​បន្ថែម​ទៅដល់អ្នកអាន។ ប្រសិន​បើ​មិនមាន​គុណតម្លៃ​បន្ថែម​ទេ បច្ចេកទេសនោះគឺឥតប្រយោជន៍។

និយមន័យព័ត៌មានវ៉ិបសាយ

ព័ត៌មានលើវ៉ិបសាយគឺខ្លីជាងព័ត៌មានលើប្រព័ន្ធ​ផ្សព្វផ្សាយ​ផ្សេងទៀត។ មិនថាជា​អត្ថបទសរសេរ​ សំឡេងឬជាវីដេអូទេ ភាគច្រើន​គឺ​មានកំណត់ដោយសារ​តែ​ការផ្ចង់​​អារម្មណ៍​របស់​អ្នកអាន​នៅ​​លើ​អេក្រង់ (តំណភ្ជាប់ក្នុង​ទៅសំណុំឯកសារ​៨) គឺខ្លីខ្លាំងណាស់ ៖ មិនលើសពី៦ ០០០តួ​អក្សរសម្រាប់​អត្ថបទសរសេរ មិនលើសពីមួយនាទីសម្រាប់សំឡេង ឬបីនាទីសម្រាប់វីដេអូ។ បើលើស​ពី​នេះ អ្នក​ចាំបាច់​ត្រូវ​មានវិធីសាស្ត្រធ្វើឲ្យ​ព័ត៌មានអ្នកមានភាពទាក់ទាញ។ ​បើ​លើស​ពី​ខ្នាត​ខាងលើនេះ អ្នក​អាន​នឹងមិនអានអត្ថបទរបស់អ្នកដល់ចប់នោះឡើយ។

ដូច្នេះព័ត៌មានលើវ៉ិបសាយ​គឺ​ខ្លី​ និង​មាន​ចំណុចចុចចូល​ច្រើន​ ដើម្បី​ចាប់​យក​ចំណាប់​អារម្មណ៍​របស់​អ្នក​អាន តាមរយៈការប្រើប្រាស់នូវ«ឧបករណ៍ផ្សព្វផ្សាយសម្បូរបែប»​(តំណ​ភ្ជាប់​​ក្នុង​ទៅ​សំណុំឯកសារ​៩) ពោលគឺបណ្ដុំ​​បច្ចេកទេស​ដែល​នាំ​មក​នូវ​ភាព​សម្បូរបែប​របស់​ព័ត៌មាន (ប្រព័ន្ធ​ផ្សព្វផ្សាយចម្រុះ) និង​ភាពស៊ី​ជម្រៅនៃអត្ថបទ (តំណភ្ជាប់​ក្នុងនិងក្រៅ) ដោយ​ធ្វើយ៉ាងណា​​សម្រប​តាម​បញ្ហា​ប្រឈមនៃការរុករកលើ​អ៊ិនធឺណិត។

ហេតុអ្វីដាក់រូបថត សំឡេង ឬវីដេអូ?

ធ្វើការតាមអនឡាញ អ្នក​ត្រូវ​តែសួរខ្លួន​ឯងនូវសំណួរមួយ ៖ តើ​ប្រព័ន្ធផ្សព្វផ្សាយ​ប្រភេទអ្វី​ត្រូវ​នឹង​សាច់រឿងអ្នក? ជាទូទៅ៖

  • អត្ថបទសរសេរគឺជាមធ្យោបាយសាមញ្ញបំផុតនិងស្រួលបំផុត
  • សំឡេងត្រូវបានប្រើជាញឹកញាប់សម្រាប់បទយកការណ៍ និងកិច្ចសម្ភាសន៍
  • រូបភាព (រូបថតឬវីដេអូ) អនុញ្ញាតឱ្យបង្ហាញប្រធានបទ«សមូហភាព»​ដូចជាបាតុកម្ម ព្រឹត្តិការណ៍ធំៗ ឬសកម្មភាព​ដែល​មាន​បុគ្គល​ច្រើន​នាក់ពាក់​ព័ន្ធ ។

ពេលអ្នកមានចម្លើយហើយ អ្នក​ត្រូវ​វាយ​តម្លៃភ្លាមថាតើ​​អ្នក​អាចឆ្លើយ​តប​តាម​បច្ចេកទេស​ទៅ​នឹង​បញ្ហា​នោះបានដែរឬទេ។ នេះ​ជា​មូលហេតុ​ដែល​គ្រប់ផ្នែកនិពន្ធវ៉ិបសាយ​ត្រូវ​អាច​ថ​ត​សំឡេង​​ ថតវីដេអូ និងថតរូប ហើយដាក់លើអ៊ិនធឺណែត។ សព្វថ្ងៃនេះ​វាមាន​ងាយ​ស្រួល​ដោយសារ​ឧបករណ៍ទាំងនោះ​ងាយស្រួលប្រើ​ និង​មានតម្លៃទាប ដូចជា​ស្មាតហ្វូន និងកាមេរ៉ា​ជាដើម ។

អ្នកកាសែតពហុព័ត៌មានត្រូវចេះគ្រប់យ៉ាង?

ពេលខ្លះ​អ្នកកាសែតពហុព័ត៌មាន​ត្រូវ​បាន​គេ​ពិពណ៌នា​ថា​ជា​«ព្រះសិវៈ​ព័ត៌មាន»​​មាន​សមត្ថភាពអាច​​ធ្វើ​បាន​គ្រប់​យ៉ាង​។ ពួកគេ​ត្រូវ​ចេះពី​បច្ចេកទេសទាំង​អស់​នេះ។ តែ​មិនមែន​មានន័យថា​ពួកគេគួរតែប្រើវាទាំងអស់ក្នុងពេលតែមួយទេ។ តាមពិត ​វា​មិន​អាច​ទៅរួចឡើយ​។ ដូច្នេះ​អ្នក​ត្រូវ​បំភ្លេចពី​អ្នកដែលធ្វើពុតជាចេះធ្វើគ្រប់យ៉ាងក្នុងពេលតែមួយចោល​ទៅ។ រឿងបែបនេះមិនមានទេ។ ប៉ុន្តែវា​ជាការចាំបាច់​ដែល​​អ្នក​ត្រូវ​ជ្រើស​រើសប្រើ​​បច្ចេកទេស​ណាមួយ មុននឹង​ចុះទៅយកព័ត៌មាន។ ពេលខ្លះអ្នកអាច​ប្ដូរចិត្តវិញបាន​​នៅតាមផ្លូវ ប្រសិនបើកាលៈទេសៈបង្ខំ។